" በአንድ ስም ሁለት የፓለቲካ ፓርቲዎችን መመዝገብ አንችልም " የኢትዮጵያ ምርጫ ቦርድ – ዘ-ሐበሻ (ZeHabesha): Latest Ethiopian News and Point of View 24/7

” በአንድ ስም ሁለት የፓለቲካ ፓርቲዎችን መመዝገብ አንችልም ” የኢትዮጵያ ምርጫ ቦርድ

1 min read
4
አማራ ሚዲያ ማዕከል /አሚማ /
ነሐሴ 15 ቀን 2011 ዓም
አዲስ አበባ ሸዋ

በአቶ ዳውድ ኢብሳ የሚመራው የኦሮሞ ነጻነት ግንባር ኦነግ እና በአባ ነጋ ጃራ የሚመራው ኦነግ ቀደም ሲል ተዋህደው አንድ እንደሚሆኑ ያስታወቁ ቢሆንም በቅርቡ ግን ሁለቱም በኦነግ ስም ከምርጫ ቦርድ እውቅና ለማግኘት የምዝገባ ሂደት መጀመራቸው ተሰምቷል።

ጉዳዩን በማስመልከት የኦነግ ሊቀ መንበር አቶ ዳውድ ኢብሳ “እኛ የምናውቀው የምርጫ ቦርድ የሚጠይቀውን ሁሉ ህግ አሟልተን መግባታችንን ነው ማለታቸው ተገልጧል።

“እንደሕጉ ከሆነ ከመመዝገብ የሚከለክለን ነገር የለም። ውሳኔው የምርጫ ቦርድ ነው። የተለያዩ የፖለቲካ ድርጅቶች ጋር አንድ ለመሆንና ለመዋሃድም እየሰራን ነው። ኦነግን በተመለከተ ግን እኛም የኦሮሞ ሕዝብም የሚያውቀው አንድ ኦነግ ነው ያለው” ብለዋል።

የሌላኛው ኦነግ መሪ አባነጋ ጃራ ደግሞ “ምርጫ ቦርድ መመዝገብ ሕጋዊ ግዴታችን ነው። መመዝገብ ስላለብንም ነው ሂደቱን የጀመርነው። ኦነግን አንድ ድርጅት የማድረግ ሥራ ግን የፖለቲካ ሥራ ነው። እየተነጋገርንበት ነው። በቅርቡ ጨርሰን አንድ እናደርገዋለን” የሚል ምላሽ ሰጥተዋል።

“አንድ ድርጅት መዝግቡኝ ስላለ የሚመዘገብ አይደለም፤ ረጅም ጊዜ ይወስዳል። የፓርቲ ፕሮግራምን ማስኬድ፣ ቃለ ጉባኤ ማየትና የጠቅላላ ጉባኤ ማካሄድ የሚባሉት ነገሮች ማለቅ አለባቸው። እነሱ ካለቁ በኋላ ነው ለቦርዱ ለውሳኔ የሚቀርበው” በማለት ሁለቱ የፖለቲካ ፓርቲዎች በአንድ ስም እንመዝገብ ማለታቸው ውሳኔ የሚያገኝበትን መንገድ የምርጫ ቦርድ የኮሙኒኬሽን አማካሪ ሶሊያና ሽመልስ አብራርተዋል።

አሁን ባለው ሁኔታ ግን ሁለቱም እዚህ ደረጃ ላይ አልደረሱም የሚሉት ወ/ሮ ሶሊያና በዚህ ውዝግብ ለማንም የተሰጠ የስም እውቅና አለመኖሩን አረጋግጠዋል።

ሁለቱም ግን ‘ኦነግ’ ነው ስማችን ብለው የምዝገባ ሂደት እንደጀመሩ እናውቃለን የሚሉት አማካሪዋ በአንድ ስም ሁለት የፖለቲካ ፓርቲዎች መመዝገብ እንደማይችሉም ተናግረዋል።

በስም ይገባኛል ሂደቱም አንደኛው ቀድሞ ሂደቱን ስለጀመረ ሁለተኛውን አንተ አይመለከትህም ማለት እንደማይቻልም እና ውሳኔ የሚሰጠውም የሁለቱንም አመልካቾች ዝርዝር መስፈርት ከታየ በኋላ መሆኑን አማካሪዋን ዋቢ በማድረግ የገለፀው ቢቢሲ አማርኛ ነው።