እንኳን ደስ ያለን፣ ዓባይ ከቤት ዋለ! – ዘ-ሐበሻ (ZeHabesha): Latest Ethiopian News and Point of View 24/7

እንኳን ደስ ያለን፣ ዓባይ ከቤት ዋለ!

1 min read
1

አገራችን ኢትዮጵያ ብዙ የተፈጥሮ ሃብት በውስጧ አምቃ የያዘች አገር ናት። ይሁን እንጂ የተለያዩ ፖለቲካዊና ኢኮኖሚያዊ ችግሮች በፈጠሩት ተግዳሮቶች ምክንያት ዕምቅ ሃብቷን በበቂ መጠቀም ያልቻለች አገር መሆኗ ደግሞ እሙን ነው። ከነዚህ እምቅ የተፈጥሮ ሃብቶቿ አንዱ የዓባይ ውሃ ነው። ዓባይ የኢትዮጵያን ለም አፈር ተሸክሞ አገር አቋርጦ በመጓዝ የታችኛው ተፋሰስ አገሮችን ሲመግብ መኖሩ ይታወቃል። እነዚህ ጎረቤት ተፋሰስ አገሮች የዓባይን ውሃ በመጠቀም ዘመናዊ እርሻና የኤሌክትሪክ ኃይል በማመንጨት አገራቸውን በከፍተኛ ደረጃ አበልጽገዋል። ያለማንም ጠያቂ ግድብም ገድበው እየተጠቀሙ ይገኛሉ። ግብፆች ወደ ሃገራቸው የሚፈሰውን 86% ውሃና ተሸክሞት የሚነጉደውን ለም አፈር በረከት የሚሰጣቸው ጥቁር ዓባይ የሚመጣው ከኢትዮጵያ መሆኑን በትክክል ያውቃሉ። ይሁን እንጂ የውሃው ባለቤት እኛ እንጂ ኢትዮጵያ አይደለችም በማለት በዓለም መድረክ ላይ ከግብረአበሮቻቸው ጋር በመሆን የዓለምን ሕዝብ ለማሳመን ከፍተኛ የገንዝብና የሰው ኃይል መድበው ሲዘምቱብን ኖረዋል። ለልጆቻቸውም ዓባይ መነሻውም ግብፅ ውስጥ፣ መድረሻውም ግብፅ እንደሆነ አድርገው የተሳሳተ ትርክትን ሲያስተምሯቸው ኖረዋል። ግብፅ ያመቸኛል ባለችበት ጊዜም ዓባይን ከምንጩ ለመቆጣጠርና ኢትዮጵያን አዳክማ ወይም አጥፍታ ለመግዛት በተለያዩ ጊዜያት ወታደር አዝምታ፣ በኢትዮጵያ ላይ ጦርነት ከፍታ ነበር። ነገር ግን የኢትዮጵያ ሕዝብ የአገሩ ዳር ድንበር ሲነካበት ቀፎው እንደተነካበት ንብ በአንድ ላይ ተነስቶ እንዳመጣጧ በተደጋጋሚ አሳፍሮ መልሷታል። ግብፅ ኢትዮጵያ የሌለችበትን የቅኝ ግዛት የውሃ ክፍፍል ውል አገራችን እንድትቀበል ለማድረግ ከፍተኛ ወጭ በማውጣት ይኽው እስካሁን ትሞግታለች። ይህንኑ ለማሳካት በዲፕሎማሲው ረገድም የማትፈነቅለው ድንጋይ የላትም። አገሯን በእርሻና በመብራት ኃይል ስታለማ ኢትዮጵያ ግን በተደጋጋሚ በከፍተኛ ድርቅና ረሃብ ትጠቃለች።

አብዛኛው የኢትዮጵያ ሕዝብ የሚጠጣ ንጹህ ውሃና የኤሌክትሪክ መብራት የለውም። እነዚህ አገልግሎቶች አሉ በሚባሉባቸው ቦታዎችም በበቂ ባለመኖራቸው የሀገሪቱን የመልማት አቅም እንዲቀጭጭና ሕዝቧም በንጹህ የመጠጥ ውሃ እጦት በበሽታ እንዲሰቃይ ሆኗል። ይህን ችግር ለመቅረፍ ኢትዮጵያ ታላቁን የዓባይ ግድብ መሥራት ከወጠነችበት ጊዜ ጀምሮ ግብፅ አንዳንዴም ከሱዳን ጋር በመተባበር ግድቡ እንዳይሠራ ከፍተኛ እንቅፋት ስትፈጥር ቆይታለች። የዓለም አቀፍ የገንዝብ ተቋማት ለግድቡ ማሠሪያ የሚውል ገንዝብ እንዳያበድሩ ከመከላከል አልፋ ጦርነት እከፍታለሁ እስከ በማለት እስካሁኑ ሰዓት ድረስ ትዝታለች። የተለያዩ እንቀፋቶችንም ስተደረድር ይታያል።

ሀገራችን ይህን ሁሉ ዘመቻ ተቋቁማ ያለምንም የውጭ ብድር በኢትዮጵያ ሕዝብ ገንዝብ እየተገነባ ያለው ግድብ የመጀመሪያውን የውሃ ሙሌት መጀመሩን የተቀበልነው በከፍተኛ ኩራትና ደስታ ነው። ከዕለት ጉርሱ እየቀነሰ ገንዝቡን በማዋጣትና ቦንድ በመግዛት “ዓባይ የኔ ነው” ብሎ በቆራጥነት እየተሳተፈ ያለውን የኢትዮጵያን ሕዝብ፣ ኢሕአፓ ከልብ ያመሰግናል። ግድቡን በመሥራት- በሥራ አስኪያጅነት፤ በሞያተኝነት፤ በተደራዳሪነትና በዜጋ ዲፕሎማትነትና በሌሎችም መስኮች ሁሉ የዜግነት ግዴታቸውን ለተወጡና ለተባበሩ ኢትዮጰያውያን ሁሉ ኢሕአፓ አድናቆቱን ይገልፃል።

ሥራው ተገባደደ እንጂ አላለቀም፣ በመሆኑም ፓርቲያችን ከሕዝባችን ጋር በመሆን የግድቡ ሥራ እንዲጠናቀቅ የሚያስፈልገውን ዋጋ ሁሉ ለመክፈል ዝግጁ መሆኑን ያረጋግጣል። ታላቁ የኢትዮጵያ ህዳሴ ግድብ ሥራው መጠናቀቁ ብቻ ሳይሆን ከዚያ ባሻገር የግድቡ ዘላቂ ደህንነት መረጋገጥና ተጓዳኝ የልማት ሥራዎችን መሥራት እንዲቻል ሁላችንም በጋራ ሆነን፣ ያለምንም መታከት፣ ከፍተኛ ሥራ መሥራት እንደሚያስፈልገን ኢሕአፓ ለማሳሰብ ይወዳል። የዓለም የውሃ ተፋሰስ አገሮች ሕግ በሚያዘው መሠረት ኢትዮጵያ የታችኛው ተፋሰስ አገሮችን በማይጎዳ መንገድ ፍትሃዊ ተጠቃሚነት መርኅ ባደረገ

መንገድ የምታደርገውን ድርድር የምንደግፍ መሆናችን በድጋሚ እንገልጻለን። የአገራቸውን ጥቅም ለሥልጣንና ለገንዘብ ብለው አሳልፈው ለመስጠት ሽር ጉድ የሚሉትን አገር በቀል ግለሰቦችንም ሆነ ድርጅቶች ወደቀልባቸው እንዲመለሱ ልናሳስባችው አልፎም ልንታገላቸው ይገባል።

ግብፅ አገራችን ያላትን የውሃ አቅም የመጠቀምና የመልማት ተፈጠሯዊ መብት ለመንፈግ የምታደርገውን ዛቻ ኢሕአፓ አጥብቆ ያወግዛል። ከሕዝባችን ጎን ቆመን ልንታገላትም መቁረጣችን እንዲታውቅ ያስፈልጋል። ከአገር ውጭ ያሉ ኢትዮጵያውያን የአገራችን መብት ላለማስደፈር የሚያደርጉትን የቴክኒክ፣ የዲፐሎማሲና የቈሳቁስ ርብርብ እጠናክረው እንዲቀጥሉ ከልብ እናበረታታለን።

አዲሱ ትውልድ ይህን የአገር ሃብት የሆነውን ታላቁን የኢትዮጵያ ህዳሴ ግድብ እንዲንከባከበውና የትውልዱ የአድዋ ድል ተምሳሌት እንደሆነ ጠንቅቆ እንዲያጤን ከልብ እንመክራለን። የተፎካካሪ ፓርቲዎችም የአገራችንን ብሄራዊ ደህንነት ከሕዝባችን ጋር ቁመን በጋራ እንድንጠብቀው፣ ለአባሎቻችንና ደጋፊዎቻችን እንድናስተምር በዚህ አጋጣሚ ኢሕአፓ ጥሪውን ያቀርባል።

እንኳን ደስ ያለን! ፈጣሪ ኢትዮጵያን ይባርክ!
የኢትዮጵያ ሕዝባዊ አብዮታዊ ፓርቲ
ሐምሌ 23 ቀን 2012 ዓ. ም
አዲስ አበባ

1 Comment

  1. The question that hasn’t been raìsed at least in püblic in so many ways is, given the current political set up which killil is going to benefit from the dam, is it going to be a tool of further control and supressoon on the ethiopian popülation or certain kilĺils and many more somilar questions? Until such critical questions are answered i think we need to hold of the eouphoria over the damm. If it becoomes unother tool of suppression ir another tool to increase already high levels of desparity especially for the Amhara by the regiem, then it (the damm) becomes inquensquential.:Thus the need to tone down support at the möment.

ሀሃሳብ እና አስተያትዎን ይስጡ

Your email address will not be published.

This site uses Akismet to reduce spam. Learn how your comment data is processed.