ያለ ይመስለኛል (ዘ-ጌርሣም) – ዘ-ሐበሻ (ZeHabesha): Latest Ethiopian News and Point of View 24/7

ያለ ይመስለኛል (ዘ-ጌርሣም)

1 min read

ያለ ይመስለኛል የጎደለን ነገር
በታሪክ አውድ ላይ ቆይቶ የሚዘከር
የምድር ልሂቃን ገና ያላገኙት
በምርምራቸው ያልተወያዩበት
ከእህል ከመጠጡ ከምንመገበው
ወይም ከአየሩ እንደሁ ከምንተነፍሰው
የዕድሜ ገደብ ሳይለይ ሁሉን አደንቁሮ
ከፍቅር አብልጦ መርጧል አምባጓሮ
እኛ ስንባላ ዓለም እየሳቀ
ንብረታችን ወድሞ ህዝባችን አለቀ
በደንብ ላስተዋለ ይህ የጤና አይደለም
ቢኖር ነው ጎደሎ ሁሉን የሚያስገርም
ያለ ይመስለኛል የጎደለን ነገር
በታሪክ አውድ ላይ ቆይቶ የሚዘከር
የሰው ልጅ ተራቆ ሰማይ ላይ ሲወጣ
እኛ እንታያለን ራስን በእጃችን መልሰን ስንቀጣ
ይመርመር ደማችን አጥንታችን ጭምር
በአግባቡ ይታወቅ የጎደለን ነገር
ሥነ ልቦናችን አንጎላችን ሳይቀር
ምልክት ቢያሳዩ ለጎደሎው ምስጢር
ያለ ይመስለኛል የጎደለን ነገር
በታሪክ አውድ ላይ ቆይቶ የሚዘከር
ብርሃን ሲመጣ የምናደበዝዝ
ሙቀት መጣ ሲባል የምናቀዘቅዝ
ምን ተውሳክ ቢኖር ነው ተጣብቶን የኖረ
ሁሌ የሚያያጋጨን እያደናበረ
ያለ ይመስለኛል የጎደለን ነገር
በታሪክ አውድ ላይ ቆይቶ የሚዘከር
እስኪ አንዴ ቆም እንበል
ነገር እናስተውል
ጉድለቱን ተረድተን እራስን ለማወቅ
ምንድን ነው ጎደሎው
ከእኔ ጋር የሌለው
በማለት እንጠይቅ
ካልቻልን እናስጠይቅ
ጎደሎ መኖሩ ግልፅ ነው ይታያል
ክብደቱ አመዝኖ ባዶነት ያሳያል
ያለ ይመስለኛል የጎደለን ነገር
በታሪክ አውድ ላይ ቆይቶ የሚዘከር

ሀሃሳብ እና አስተያትዎን ይስጡ

Your email address will not be published.

This site uses Akismet to reduce spam. Learn how your comment data is processed.