ጣና በገንዘብ ሳይሆን በአስተሳሰብ ድህነት ምክነያት እየሞተ ነው - ሰርፀ ደስታ – ዘ-ሐበሻ (ZeHabesha): Latest Ethiopian News and Point of View 24/7

ጣና በገንዘብ ሳይሆን በአስተሳሰብ ድህነት ምክነያት እየሞተ ነው – ሰርፀ ደስታ

1 min read

ሰሞኑን ስለጣና በብዛት እየተወራ ነው፡፡ ወሬው ግን ከወሬን አልፎ የት እንደሚደርስ አላውቅም፡፡ መሬት ላይ የሚንሰማው ነገር ሐይቁ በፍጥነት ወደመሬትነት እየተቀየረ እንደሆነ ነው፡፡ በእኛ አገር ችግርን ለማስወገድ ምን ማድረግ እንዳለብን እንዳናስብ አዚም የሆነብን ነገር ያለ ይመስለኛል፡፡ ለዛም ይመስላኛለ ከኢትዮጵያ አልፎ አካባቢውን በሙል ሊመግብ የሚችል መሬት ላይ ተቀምጠን በየአመቱ በሚሊየን የሚቆጠር የሚራብ ሕዝብ የምናስመዘግበው፡፡ ችግርን ከመፍታት ይልቅ ችግሩን የገቢ ምንጭ የሚያደርገው ብዙ ነው፡፡ በሌላው ችግር መኖርን ከስልጥኑነት፣ ከምሁርነት እንደመቁጠር ነው ነገረ ሥራችን ሁሉ፡፡ ችግር ችግርን በመፍታት ታላቅነት ለሚያስመዘግቡ እንደ ጥሩ አጋጣሚ ስለሚቆጠር የነበረን ችግር በማስወገድ ለሚመጣ ታሳቢ ለሆነ ችግር በብቃትና በስፋት ለመዘጋጀት ከችግሩም ቀድመው እድገትን ለማምጣት ለሚሰሩ አእምሮዎች ትልቅ አድል ነው፡፡ በእኛው አገር ግን ያለን አስተሳሰብ ከዚህ በተቃራኒው ነው፡፡ ብዙዎች በቁጭት የነበረባቸውን ችግር ተወጥተው ዛሬ በደስታ ይኖራሉ፡፡ እኛ ያልነበረብንን ችግር ፈጥረን ለስደትና ለስቃይ ተዳርገናል፡፡ ዛሬ በየ ዓረብ አገሩ ያሉ እህቶቻችን ሰው ሁሉ ወደቤቱ በተሰበሰበበት ወቅት ወደ ውጭ እየተጣሉ እናያለን፡፡ እርግጥ ነው የማያቋርጥ በደሎችንና ስቃዮችን ስንሰማ ብንኖርም ከአንድ ሰሞን ወሬ ከንፈር መጠጣ ያላለፈ ነው፡፡ የአስተሳሰባችንን ሁኔታ እንድታስቡት ነው፡፡ ቁጭት የለብንም፡፡ ችግርን እንደ አጋጣሚ ቆጥሮ ችግሩን ገበያ የሚያደርግ እንጂ ችግርን የሚፈታ የለወም፡፡ ጣናም ሆነ ሌሎች ወሀ ቦታዎቻችን እየጠፉ ያሉት በአስተሳሰባችን ድህነት እንጂ ችግሮቹ የማይፈቱ ሆነው አደለም፡፡ በአጠቃላይ የአገራችን ችግሮች በአብዛኛው ከአስተሳሰብ ድህነት የሚመነጩ ናቸው፡፡

ማንንም ሞኮነን አልችልም፡፡ እኛው ነን፡፡ ዛሬ ስልጣን ላይ ያሉት ከየትም የመጡ አደለም፡፡ ከዛው ነው፡፡ ሌሎችም ወደስልጣን የሚሮጡት ምንም የተለየ ነገር ኖሯቸው አደለም፡፡ ምሁራኑም እንደዛው ነን፡፡ ያኔ 30 የሚሆኑ ልጆቻችን እንጀራ ብለው ተሰደው በበረሀ የታረዱ ጊዜ ጌትነት እንየው ያቀረበውን ግጥም አስባለሁ፡፡ እኛው ነን! ዛሬ ችግርን ገበያ አድርጎ መኖር ከሁሉም የቀለለ ቢዚነስ ነው፡፡ ቆይቶ ግን ዛሬ ገበያ ያደረግንው ችግር እንደሚደርስብን አይታወቀንም፡፡

በእኔ እምነት ጣናንም ሆነ ሌሎች የውሀ ቦታዎቻችንን ከነበሩበት ችግር ማዳንና ለቀጣይም በዘላቂነት የምንደሰትባቸው ሥፍራዎች ማድረግ የሚቻል ብቻም ሳይሆን የዛን ያህል ከባድም አደለም፡፡ ግን ችግሩ አእምሮአችንን እንዴት መቀየር እንዳለብን ሳሰብ የሚደክም ነው፡፡ ጣና እየሞተ ያለው በአስተሳሰብ ደህነት እንጂ በገንዘብ ድህነት ምክነያት እንዳለሆነ ግልጽ ነው፡፡ በዚህ ጉዳይ ከወሬ በላይ አስተዋጽኦ ማድረግ እፈልጋለሁ ብሎ የሚያስብ ቅንነት ያለው አስተሳሰብ ቢከማች መልካም ነው፡፡ ምሁር መሆን አይጠበቅም፡፡ ሀሳብ ሊያመነጩ የሚችሉ ምሁራን የኖራሉና፡፡ ሆኖም የሚመነጨውን መልካም ሀሳብ በመደገፍና ወደተግባር በመቀየር ያለውን ሂደት በመሳተፍ የጣናን ችግር ብቻም ሳይሆን በዘላቂነት የኢትዮጵያ ተፋሰሳትን ችግር መፍታት ይቻላል፡፡ በጣና ችግርን ማስወገድ መቻልን እንማረበትም ይሆናል፡፡ በመሆኑም ምሁራን ወይም ምሁርም ባትሆኑ ጣናን በመታደግ ደረጃ ሀሳብ አለኝ የምትሉ ብታጋሩን፡፡ ሌሎች ለሚነሱ መልካም ሀሳቦች ድጋፍ ብታደርጉ(ገነዘብ ላይሆን ይችላል፣ በቀጥታ ተሳትፎ የምትጋበዙበት ጊዜ ስለሚኖር)፡፡  ጣናን በመታደግ ችግርን ማስወገድን እንለማመድ፡፡

አስተያየት ለመስጠት የምትፈልጉ TanaBahir@gmail.com

አመሰግናለሁ!

ቅዱስ እግዚአብሔር አገራችንን ከክፉ የጠብቅ! አእምሮአችንን ይክፈት! ጥበብና ማስተዋሉን ያድለን! አሜን!

ሰርፀ ደስታ

ሀሃሳብ እና አስተያትዎን ይስጡ

Your email address will not be published.

This site uses Akismet to reduce spam. Learn how your comment data is processed.