በአገር ውስጥና ከሀገር ውጭ ለምትገኙ ኢትዮጵያውያን የእስልምና እምነት ተከታይ ወገኖቻችን፣ እንኳንም ለ1441 የረመዳን/ኢድ አልፈጥር በዓል በሰላም አደረሳችሁ – ዘ-ሐበሻ (ZeHabesha): Latest Ethiopian News and Point of View 24/7

በአገር ውስጥና ከሀገር ውጭ ለምትገኙ ኢትዮጵያውያን የእስልምና እምነት ተከታይ ወገኖቻችን፣ እንኳንም ለ1441 የረመዳን/ኢድ አልፈጥር በዓል በሰላም አደረሳችሁ

1 min read

ግንቦት 14 ቀን 2012 ዓም

የእንኳን አደረሳችሁ መልካም ምኞት መግለጫ፣

በአገር ውስጥና ከሀገር ውጭ ለምትገኙ ኢትዮጵያውያን የእስልምና እምነት ተከታይ ወገኖቻችን፣ እንኳንም ለ1441 የረመዳን/ኢድ አልፈጥር በዓል በሰላም አደረሳችሁ በማለት ዓለም ዐቀፍ የኢትዮጵያውያን ትብብር ለፍትኅ መልካም ምኞቱን በደስታ ይገልጻል።

ሁላችንም እንደምናውቀው፣ ወቅቱ ኮቪድ 19 የተባለ አደገኛ በሽታ በዓለም ላይ ተሰራጭቶ የሚገኝበት ወቅት በመሆኑ፣ ይህንን ታላቅ በዓል ከሌላው በተለየ ሁኔታ እንድናከብረው ተገደናል።

ስለረመዳን ስናወሳ ብዙ ነገሮችን ማስታወስ አስፈላጊ ነው ብለን እናምናለን።

አንደኛ፣ በዓሉ የኢትዮጵያዊነት የጋራ እሴቶቻችንን አብረን የምንፈትሽበት መልካም አጋጣሚ ነው። ታሪካችንን ወደኋላ መለስ ብለን ካየን፣ ኢትዮጵያና ኢትዮጵያውያን ለዓለም ካበረከቱት ታላላቅ ሥራዎች መካከል ለእስልምና እምነት ልደትና ዕድገት ያደረጉት አስተዋፅኦ በዋነኛነት ከሚጠቀሱት ውስጥ አንዱ ነው። የእስልምና እምነት በነቢዩ መሐመድ አስተምሮ እየጠነከረ፣ተከታዮቻቸውም እየበረከቱ ሲሄዱ ያዩት አብዛኞቹ የትውልድ አገራቸው ሰዎች የማጥፋት ርምጃ ሲወስዱ፣ አገራችን ኢትዮጵያ ግ ን የነቢዩን ቤተሰብ ፣ ባልንጀሮቻቸውንናተከታዮቻቸውን ተቀብላ መጠጊያሰጥታ፣ በማስተናገድየእምነቱን ደጋፊዎች ከተደቀነባቸው የሞት አደጋ አድና በሕይወት አቆይታለች። ሊያጠፏቸው ሲሉ ተከታትለውዋቸው የመጡት ጦረኞች ፣ በርካታ የእጅ መንሻ ፣ እንዲሁም የወርቅና ሌሎች የተለያዩ ውድ ስጦታዎች በመስጠት ጥገኞቹን አሳልፎ እንዲሰጣቸው አጥብቀው ቢጠይቁም እምቢ ከማለት ዐልፎ፣ጥገኞቹ በኢትዮጵያ ምድር እስካሉ ድረስ ማንም ሳይነካቸው በእምነታቸው ጸንተው መቀጠል እንደሚችሉ አረጋግጦላቸዋል። በዚህም ኢትዮጵያ ነቢዩ እንዳሉላት፣ የፍትህና የርትዕ፣ ማንም በእምነቱ የማይሰደድበት ነፃ አገር መሆኗን አስመሰክራለች።

ሕዝባችንም ማንንም በእምነቱና በዘሩ ሳይለይ ከፍተኛ አስተናጋጅና ተወዳጅ መሆኑን ለነቢዩ ስደተኞች ባሳየው እንክብካቤና ፍቅር አሳይቷል። ነቢዩ መሐመድ በመጀመሪያው ሂጂራ ተከታዮቻቸውን ወደ ኢትዮጵያ ሲልኳቸው፣“ወደ ሐበሻ ምድር ሂዱ!” ሲሉ፣ ይኸንን የሕዝባችንን ልበሰፊነትና እንግዳ አፍቃሪነት በመረዳት መሆኑ አያጠራጥርም። ረመዳንን የመሰለ ታላቅ በዓል በምናከብርበት ሰዓት፣ ከፊታችን የሚደቀን የታሪክ መጻሕፍት የሚተርኩልን ነገር ቢኖር፣ይህንን ዐይነቱን የተስፋ ስንቅ የሰነቁ የእስልምና እምነት ተከታዮች ወደ ኢትዮጵያ ሲመጡ የገጠማቸዉ ፍርሃት ሳይሆን ደስታና እፎይታ ነበር ።

ከዚህ በተጨማሪ፣ ከመካ ነዋሪዎች መካከል በቅድሚያ እስልምናን የተቀበለና የነቢዩም ቀዳሚ ተከታይ እንደሆነ የሚነገርለት ቢላል ኢትዮጵያዊ ነበር። በነቢዩ መሐመድ ከመላው ዓለም አገራት መካከል፣ አትንኩዋት የተባለላት ሀገርም ኢትዮጵያ ብቻ ነች

ሁለተኛ፣ ከታሪክ ባሻገር፣ረመዳን ያለንን ተካፍሎ የመብላት ፣ ለደሀ ወይም ለሌለው የማካፈል፣የመስጠት፣ ወንድም ወንድሙን የሚደግፍበት ጊዜ ነው፣ ረመዳን ከምግብና ከመጠጥ ተርቆ ሥጋን በድሎ ወደ አላህ/ፈጣሪ የሚጸልይበት ወቅት ነው።

ሀገራችን ኢትዮጵያ አሁን በመስቀልኛ መንገድ እንዳለች ብዙዎቻችን እንደምናምን አይካድም። በዚህ በረመዳን በዓል የእስልምናንም ሆነ የክርስትናን እምነት ተከታይ ሁሉ፣ዘመናት ያስቆጠረውን የመተሳሰብና የመደጋገፍ ብሎም አብሮነታችንን አጠናክረን የምንሄድበት ወቅት መሆኑን በሚገባ መመርመር ይኖርብናል በማለት ዓለም ዐቀፍ የኢትዮጵያውያን ትብብር ለፈትኅ ጥሪውን ያቀርባል።

አንዳንድ በሚከተሉት እምነታቸው ያልበሰሉ ጥራዝ ነጠቆችና ፖለቲከኞች ነን ባዮች፣ በሃይማኖት አሳብበው ከዐሥራ አራት ምእት ዓመት በላይ ያስቆጠረውን አብሮነት ለማቃቃር ሲሉ፣ በሁለቱ እምነት ተከታይ ወንድማማች መኻል ጸብ ለመጫር እላይ ታች እያሉ ናቸው። ሁላችንም እነዚህን የጥፋት መልእክተኞች ተዉ እንድንላቸው እምነታችን ያስገድዳል። ሀላፊነትም አለብን።

መሪዎቻችንን በተመለከተ፣ ነቢዩ እንዳሉት ሌላው ቢቀር እንኳን ፈርሀ እግዚአብሔር ያላቸው ሐቀኛ መሪዎችና ሰውን በሰውነቱ እንጂ በዘርና በሃይማኖት የማይለያዩን ፣ በሕገ አራዊት የማይዳኙን ሰዎች እንዲሰጠን ሁላችንም በየእምነታችን ልንጸልይ ይገባናል።

በመጨረሻም በሚቀጥለው ዓመት ይህ አስከፊ ኮቪድ 19 በሽታ ተወግዶ፣ በሀገራችን ኢትዮጵያ ፍትኅና የሕግ የበላይነት ተከብሮ፣

የታገቱት ወጣት የዩኒቨርሲቲ ተማሪዎች በሕይወት ተለቀው፣

በስደት የሚንገላቱ ኢትዮጵያውያን ወደ ቅድስት ሀገራችው ተመልሰው እንድናይ እንዲያበቃን፣ሁላችንም እንደየእምነታችን ምስጋና የምናቀርብበት እንዲሆን ዓለም ዐቀፍ የኢትዮጵያውያን ትብብር ለፍትኅ መልካም ምኞቱን በአክብሮት እየገለጸ እንኳንም ለታላቁ የረመዳን / ኢድ ሙባረክ በዓል በሰላም አደረሳችሁ እያለ መልካም ምኞቱን ይገልጻል ።

 

ኢትዮጵያ ለዘላለም ትኑር ፣

ኢድ ሙባረክ!

ዓለም አቀፍ የኢትዮጵያውያን ትብብር ለፍትኅ

GLOBAL UNITED ETHIOPIANS MOVEMENT FOR JUSTICE

POBOX 3005 Tucker GA. 30085

mailto:guethio.4justice@gmail.con

ሀሃሳብ እና አስተያትዎን ይስጡ

Your email address will not be published.

This site uses Akismet to reduce spam. Learn how your comment data is processed.